INFO:

H1B ವೀಸಾದಲ್ಲಿ ಆಗಿರುವ ಇತ್ತೀಚಿನ ಬದಲಾವಣೆಗಳ ಬಗ್ಗೆ ಭಾರತದ ವಿದೇಶಾಂಗ ಸಚಿವಾಲಯವು ಅಮೆರಿಕದ ಆಡಳಿತದೊಂದಿಗೆ ನಿರಂತರ ಸಂಪರ್ಕದಲ್ಲಿದೆ. ಈಗಾಗಲೇ ವೀಸಾ ಶುಲ್ಕ ಅನುಷ್ಠಾನದ ಬಗ್ಗೆ ಅನುಮಾನಗಳು, ಪ್ರಶ್ನೆಗಳಿಗೆ ಉತ್ತರಿಸುವ ಸ್ಪಷ್ಟನೆಯನ್ನೂ ಪ್ರಕಟಿಸಿದೆ. ಇದು ಈಗಷ್ಟೇ ಉದ್ಭವಿಸಿರೋ ಪರಿಸ್ಥಿತಿ ಆಗಿರೋದ್ರಿಂದ ಮಾತುಕತೆಗಳು ನಡೆಯುತ್ತಿರುವುದಾಗಿ ಭಾರತದ ವಿದೇಶಾಂಗ ಸಚಿವಾಲಯದ ವಕ್ತಾರ ರಣಧೀರ್ ಜೈಸ್ವಾಲ್‌ ತಿಳಿಸಿದ್ದಾರೆ. ಅಂದ್ರೆ, ಅಮೆರಿಕಕ್ಕೆ ಭಾರತೀಯ ಉದ್ಯೋಗಿಗಳು, ಪ್ರತಿಭಾನ್ವಿತರು ಪ್ರವೇಶ ಪಡೆಯೋಕೆ ದಾರಿಯಾಗಿರುವ H1Bಯಲ್ಲಿ ಆಗುತ್ತಿರುವ ಬದಲಾವಣೆಗಳನ್ನು ಭಾರತ ಸರಕಾರ ಅತ್ಯಂತ ನಿಕಟವಾಗಿ ಗಮನಿಸ್ತಿದೆ ಅನ್ನೋದು ಗೊತ್ತಾಗಿದೆ. ಇದು ಕಂಪನಿ ಮತ್ತು ಉದ್ಯೋಗಕ್ಕೆ ಮಾತ್ರ ಸಂಬಂಧಿಸಿದ್ದಲ್ಲ, ಎರಡೂ ದೇಶಗಳ ಬಾಂಧವ್ಯಕ್ಕೂ ಸಂಬಂಧಿಸಿದ್ದಾಗಿದೆ.